大館石階影院（2023年1月至2月）：「你（妳）令我瘋狂」

八至九十年代初嘅香港電影，除咗笑餐飽、打餐飽之外，寫愛情，甚至愛慾，其實同樣拿手、熟練。同如今嚮往素雅嘅文青風，又或者以議題為主嘅創作方向相比，當時嘅港產片，不單止口味重，題材若涉及社會狀況，比較多係圍繞反權威方向寫，而少直接提公義嘅界限。

嗰陣為咗得到顯著嘅戲劇效果，就算單講愛與被愛嘅戲，好多時亦會不擇手段推高人性嘅矛盾嚟增加衝突。呢段時間，雖然每部戲都有企理衣著、美術幫補，但裡面嘅思想同價值觀，依然係娛樂基層為主。最經典例子，莫過於講富家女愛上古惑仔嘅《天若有情》（1990），裡面苦心經營嘅悲劇感，實際上係透過描寫階級上嘅落差而嚟。觀眾當然清楚男主角要死，而佢嘅局限（自卑）就係要靠宿命嚟解除，從而提升至成為女主角永恆嘅回憶。用今日講法，呢啲戲太dram（dramatic）啦。不過，矛盾唔夠大，衝突唔夠強，隱藏起嘅幽微人性，就好難被勾起，浮現出嚟。

比如講，我哋可以喺林嶺東導演嘅《愛神一號》，睇到主角葉倩文、鄭浩南之間，嗰種近乎由虐待建立嘅關係。尤其是互相掌摑一幕，於我，雖未至於係童年陰影，但「世界上竟然有咁嘅事」呢種疑惑，一直盤據腦海。另外，無獨有偶，《我為你狂》早一年推出，同樣寫傷害同控制慾，不過更多係講虧欠，一筆無彎轉嘅孽債。導演金炳興書卷味多啲，情慾方面刻劃，想像力較豐富。《亡命鴛鴦》走奇情路線。導演張堅庭揉合謀殺、背叛、毒品交易等，寫冷艷殺手遇上倒楣差人。佢哋究竟點樣喺絕境之中搵出路，甚至從敵人變成戀人呢？至於《歡樂叮噹》，笑匠許冠文借鑑《熱情如火Some Like It Hot》故事，飾演男扮女裝混入女團避難嘅樂手。部戲除咗董驃、許冠英、黃韻詩等搞笑高手之外，鐘楚紅演嘅叮叮，集性感與純真於一身，誘惑力十足（呢種人物，喺近年政治正確嘅議題底下，差不多完全絕跡）。而《何日君再來》以大時代作背景。梅艷芳所演嘅歌女，活喺國家與個人感情嘅動盪裡面，既矛盾又難以自拔。究竟應該選擇愛情定係恩情，呢個結糾纏埋一齊，根本無法解開。

順帶一提，「香港女兒」喺《歡樂叮噹》有客串性嘅演出，唱起《夢幻的擁抱》變奏版，相當抵死，不容錯過。
 

馮慶強

「大館石階影院 – 你（妳）令我瘋狂」(2023年1月至2月) 策劃

為了讓觀眾對「大館石階影院」選取的電影作品有更深入的了解，包括其文化價值及一些鮮為人知的拍攝故事，二月份的「你（妳）令我瘋狂」放映後將設有映後談，歡迎觀眾留步參加，並跟我們分享你的觀後體驗。

《愛神一號》（1985）映後談

日期：2023 年 2 月 5 日

時間：下午 5 時 30 分（《愛神一號》放映後）

嘉賓：「你（妳）令我瘋狂」節目策劃馮慶強先生及本地導演黃勺嫚小姐

* 映後談以廣東話進行

《何日君再來》以抗日戰爭做背景，故事講梅伊（梅艷芳）、梁森（梁家輝）於反日示威中認識，繼而相戀。但畢竟時代動盪，戰爭持續擴大間，森決定離開愛人，投入戰場。後來，夜總會一宗命案，竟令蛻變為紅歌星嘅梅伊重遇初戀情人森。為救出身陷險境嘅革命份子，梅伊家散人亡，更因此捲入一段既痛苦又充滿內疚嘅三角關係裡面。參與演出嘅仲有吳家麗、曾江、徐少強、日本演員赤井英和、青山知可子等，陣容稱得上人強馬壯。導演區丁平出身於服裝及布料設計，曾赴海外留學，後進入電影圈，擔任《第一類型危險》、《胡越的故事》、《投奔怒海》等多部電影美術指導工作。首部導演作品《花城》（1983）視覺表現出色，令人眼前一亮。《何》係區繼《群鶯亂舞》（1988）、《說謊的女人》（1989）後野心之作，加上鮑起鳴 （即鮑德熹）構圖精緻嘅攝影，與及已故美術指導馬磐超強調質感、氛圍嘅製作設計，將大時代下悲歡離合明確勾畫。比起「必須要相信感情」呢個主題，《何》著墨最多，描寫得更徹底嘅部分，其實係人對於慾望嘅追逐。生於亂世，今日唔知聽日事，梅伊希冀共渡時艱嘅愛情，但森身處洪流之中，唔能夠講現在，只能寄託將來。兩個人因此錯開。得唔到，所以朝思暮想，形成虛空。就好似背叛丈夫嘅後母，又或者滿身罪孽嘅漢奸，佢哋都為咗某種不能彌補嘅缺失，只能夠靠墜落填補心理上黑洞。其中，梅艷芳嘅演出，今日睇更加係度身訂造，入型入格。女主角嗰種渴求幸福、完滿卻又注定不可得嘅感慨，真係只有佢去演繹，說服力先足夠。結局一幕，梅伊需作出受盡命運捉弄嘅取捨，即使殘忍，亦唯有肉體嘅歡愉可以稍稍對抗寒冷。而抉擇裡面，有嘅傷心與遺憾，梅姐演得特別細膩、精準，成為港產片最動人嘅時刻。

雖然政治部探員香明（元彪）同洛寰（陳玉蓮）名義上依然係夫妻，但本身隸屬毒品調查科嘅洛寰早已經變心，投向兇殺組警司呂進（秦祥林）懷抱。由於九七問題出現，政治部面臨解散，香明正考慮應唔應該移民之際，洛寰突遭到槍殺。事件疑點重重，香明懷疑同毒品買賣有關，私自進行調查，期間拘捕金三角女殺手翟（夏文汐）且發現案中有案之餘，包括自己在內亦成為追殺目標，被迫亡命天涯。

導演張堅庭八十年代起參與電影編劇工作，1982年憑《胡越的故事》（1981）奪得第一屆香港電影金像獎最佳編劇，之後為邵氏編導《表錯七日情》（1983），觀眾不單止反應理想，並再次得獎，開啟咗佢都市喜劇嘅創作方向。

《亡命鴛鴦》屬於張作品列嘅異數，沈鬱嘅情緒，亦係佢兩年後開拍政治喜劇片前嘅抒發。作為警匪戲，《亡》可能唔夠緊湊或者打戲太少，但以政治環境即將有嘅變化，作為角色之間衝突嘅理由，採取嘅角度好新鮮。再者，通過女兒生死，描寫香明同翟點樣從敵對變成同伴，兼慢慢產生情感上連結，過程不落俗套，亦一新耳目。夏文汐演出冷艷，槍法準又捱得打又可以殺人唔眨眼。中段佢同小女孩玩DoReMi遊戲，溫柔與暴烈同時存在，增加咗角色複雜性。意料之外係，元彪文戲罕有地多，環繞角色出現嘅巨變，佢的確演到既憤恨卻又手足無措嘅狀況，若果當成反映時代嘅弦外之音，咁結局面對呂進為自己行為作出辯解一幕，香明會因為明白佢被背叛嘅感受而震驚。最後，為埋葬已死嘅笑容，主角抱住經防腐劑處理嘅屍體，一個冇得選擇嘅未來，永遠離開。

阿發（許冠文）阿達（黎小田）兩個窮鬼，本來喺夜總會彈結他，點知有晚掛住賭馬，亂彈一通，搞到連份工都冇埋。其後因為一單毒品交易，阿發意外目擊對方遭滅口而被黑幫追殺，走頭無路之際，適逢阿達接咗份樂隊領班做，需帶一隊女子組合到泰國登台，又咁啱佢哋少咗個主音結他手，阿發索性魚目混珠，扮女人跟大隊上船，逃避追殺。旅途中，改名叫噹噹嘅阿發，一方面被靚女歌手叮叮（鐘楚紅）吸引，另一方面，又被同船嘅鱷魚大王馬力沙（董驃）睇中，搏晒命追佢，好唔得閒。阿發知道叮叮夢想嫁個有錢人，到埗後故意偽裝超級富豪親近，呢個時候，黑幫殺手追到，唯有上演一幕決戰鱷魚潭。

許冠文借用《熱情如火》（Some Like It Hot｜1959）故事，透過港式喜劇嘅佈置作出改動，成功將呢部荷里活經典喜劇本土化。《熱》由比利懷特（Billy Wilder）導演，積林蒙（Jack Lemmon）、東尼寇蒂斯（Tony Curtis）及瑪莉蓮夢露（Marilyn Monroe）主演。原版除卻夢露充滿喜感嘅驚人演出之外，兩位男主角扮鬼扮馬亦叫人捧腹。《熱》片圍繞性別倒錯發揮嘅諷刺性對白屬於比利懷特強項，相反《歡樂叮噹》嘅改編，其實無意顛覆或者質疑任何嘢，而只係以呢個戲劇處境，寫小人物生活上嘅困難同憧憬。所以阿發扮閨密接近叮叮，甚至老作自己有幾多錢，整個過程係求愛多過為咗色慾。同樣對叮叮嚟講，嚮往榮華富貴，更多係為改善生活質素，而唔係純粹嘅貪念或者虛榮。的確「冇一個人十全十美。」就好似客串演歌手嘅梅艷芳，聽佢憤憤不平講「我做咗十幾年梅香躉先有今日！」就知道，所謂際遇，本身就係苦樂參半、悲喜交集。許雖然吸收咗大量西方養份，但延續自粵語片已經有嘅善良一直存在。正如佢唔會企到好高講艱深嘅道理，更唔會貶低自己取悅基層，呢種性格始終貫徹。可惜一踏入八〇年代後期，「許冠文作品」逐漸適應唔到繁榮背後嘅荒唐、混沌，唯有讓位俾虛無得多嘅「無厘頭」。
 

當年《愛神一號》預告講：「情爆裂，周身熱！」對於呢部充滿動作戲嘅怪異愛情片，形容得非常貼切。故事寫父母已經過身嘅有錢女阿May（葉倩文），要同自小認識嘅男朋友Danny訂婚。但成件事係Danny爸爸所擺佈，畢竟阿May一直受佢照顧，若果兩家人結埋婚，實有著數。由於被圖謀不軌嘅兩仔爺灌酒，阿May暈陀陀逃走之下，捐咗落阿強（鄭浩南）翌日需赴運至泰國一首叫「愛神一號」嘅新船裡面。然後陰差陽錯，阿May、阿強受困於船上。茫茫大海嘅旅程，佢哋由水火不容，互相咒罵、虐待，到逐漸產生情愫。雙方都對呢個改變不安，感到無所適從。究竟呢段關係算唔算一時衝動呢？

要瞭解八十年代嘅香港電影，《愛》可以係其中一個切入點。比起最初有梁普智參與嘅《陰陽錯》（1983），從完整性講，其實《君子好逑》（1984）先算得上係林嶺東導演嘅第一部作品。《愛》延續咗《君》片富爭議嘅性別意識同階級觀念，並且用更加激進嘅方式、處境呈現。戲裡面，阿強充滿父權嘅表現，明顯同進步社會嘅要求格格不入，就好似要控制一首光鮮亮麗嘅遊艇，佢嘅粗野、古板、橫衝直撞，令人相當頭痛。阿May一直接受被擺佈，佢只係唔能夠忍受未婚夫毫無主見。問題係，呢兩樣嘢本身就係矛盾。所以反過嚟講，佢一直抵抗阿強嘅命令，其實只係一個過程。因為要將所謂「主見」交託俾另一個人，就要通過考驗。比如講性慾嘅忍耐力，又或者有冇決心將對方搶奪過嚟。

若果將《愛》同《我為你狂》（1984) 做個比較，就會發現兩部戲同樣糾纏喺偏激、暴躁嘅男人身上，同樣以性為題開場，亦同樣訴諸暴力結束。究竟放棄自主性嘅擁吻係一種幸福？定係搞到通地血嘅情殺先至係真愛呢？就好似鄭浩南用力扯開件恤衫同葉倩文講：「係妳話有個鎯鎯可愛啲！」從前港產片毫無顧忌嘅瘋狂，著實可見一斑。

「《我為你狂》係一部比較寫實嘅電影，但又唔係寫實到暴露種種黑暗、血肉呢個範圍，亦非單純講情感。」編導金炳興當年接受訪問時候更提到，《我》若果可以效法《靚妹仔》（1982）現場收音，效果更好。可惜因成本問題，最終無法實行。

金炳興為資深影評人，1937年出生，自小香港長大及接受教育。金不單有份創辦〈火鳥電影會〉，主編過〈中國學生周報〉電影版，亦曾經擔任早年電視台編審及編導，參與過《行規》、《兇榜》、《烈火青春》等「新浪潮」創作。

《我為你狂》故事相當簡單、直接。阿發（艾廸）阿霞（蔣麗萍）本是情侶，外表睇似乎關係穩定，但其實一般女仔渴望有嘅愛情，正與日俱增地變得激進、野蠻、偏執。事緣阿發擺明冇乜錢，但都想同阿霞結婚，女方拒絕，認為錢非主要問題，而係根本唔夾，不如分手。為挽救關係，阿發威脅跳樓。雖然之後女方心軟，應承結婚，但從思想到生活習慣，兩人完全南轅北轍。阿霞難以承受「愛」嘅迫害，衝突越來越大，導致攞刀斬人、自殘、淋火水等行動陸續出現，邁向毀滅性結局。

金炳興聯同曾淑娟、陳麗華所編寫嘅劇本，大部分時間依靠人物極端行為推動，並且沿直線發展，唔搞峰迴路轉一套。角色之間，除咗一場孽債，阿發是非觀念混亂、矛盾重重嘅特徵，其曖昧性，概括講可以話係屬於比「丁蟹」早得多出現嘅麻煩人物。加上潘恆生帶領底下，大量實景拍攝配合貼地扎實嘅燈光、美術等，令《我為你狂》整體表現脫離開以俗麗、聲色犬馬為主嘅邵氏作品列，描寫「極端的愛」而起嘅執念，甚至有種罔顧現實嘅天真在內，成績實屬罕見。